600.000 килограми мазут недостигаат од државните резерви, институциите осум години без решение

Државниот завод за ревизија утврди сериозни пропусти во работењето на Агенцијата за задолжителни нафтени резерви, меѓу кои и тоа што Министерството за одбрана повеќе од осум години не ја вратило позајмицата од 600.000 килограми мазут, со што се намалени државните резерви на овој стратешки енергент.

— реклама —

Според ревизорскиот извештај, Агенцијата не доставила предлог-одлуки за количината и структурата на задолжителните нафтени резерви до надлежното министерство за 2022, 2023, 2024 и 2025 година, поради што Владата не ги донела потребните одлуки.

— реклама —

Ревизорите дале мислење без резерва за финансиските извештаи за 2024 година, но мислење со резерва за усогласеноста со законската регулатива, упатствата и воспоставените политики.

Во извештајот се наведува дека во 2017 година, со владина одлука, тогашната Дирекција за задолжителни резерви на нафта и нафтени деривати му позајмила на Министерството за одбрана 600.000 килограми мазут за непречено функционирање на Армијата, со обврска количините да бидат вратени до крајот на истата година. Сепак, мазутот не е вратен ниту во текот на 2025 година, поради што Агенцијата евидентира побарување од Министерството во износ од 16,7 милиони денари, односно околу 271.000 евра.

— реклама —

Ревизорите посочуваат дека и покрај обидите на Агенцијата низ годините да се реши проблемот, позајмените количини сè уште не се вратени. Поради тоа препорачуваат Владата, Министерството за одбрана и Агенцијата да преземат мерки за надминување на состојбата и обезбедување на потребното ниво на државните резерви.

Во ревизијата се констатирани и неправилности при исплатата на плати и прекувремена работа. Евиденцијата за прекувремените часови не е целосна за сите вработени, а платите и надоместоците биле исплаќани врз основа на бодови повисоки од оние утврдени со Законот за административни службеници.