Седумдесет и тригодишен жител на скопското село Грушино починал по тешка несреќа со трактор, информира Министерството за внатрешни работи.
Како што соопшти МВР, на 8 јуни околу 19 часот во СВР Скопје од приватна здравствена установа во село Арачиново било пријавено дека кај нив бил донесен починат И.Ш. (73) од село Грушино.
Во разговор со полициските службеници, братот на починатиот изјавил дека несреќата се случила при стартување на трактор на кој била прикачена собирачка за сено. Тракторот, кој бил оставен во брзина, почнал да се движи, при што И.Ш. бил зафатен од собирачката.
Тој бил пренесуван кон здравствената установа, но им подлегнал на повредите пред да му биде укажана медицинска помош.
По насоки на јавен обвинител, телото на починатиот им е предадено на членовите на семејството.
