СВР Скопје го расчисти случајот со физичкиот напад врз 10-годишно девојче, кој беше пријавен вчера, а за кој на социјалните мрежи беше објавена и видеоснимка од настанот.
Според информациите од МВР, мајката на девојчето, 45-годишната Н.П.Ц. од Скопје, на 3 јули околу 22:30 часот пријавила дека еден ден претходно, околу 17:00 часот, на подрачјето на Центар, нејзината 10-годишна ќерка била физички нападната од постаро машко лице.
По преземените мерки и активности, полициските службеници утврдиле дека осомничен за нападот е Д.Ј. (74) од Скопје. Со него бил извршен службен разговор во полициска станица.
По целосното документирање на случајот, против него ќе биде поднесена соодветна кривична пријава за кривичното дело „насилство врз дете“.
