СДСМ преку соопштение обвинува дека Владата предводена од Христијан Мицкоски и министерот за здравство Сашо Клековски не реагирале навремено на здравствените предизвици со кои се соочуваат граѓаните.
Од партијата информираат дека бројот на починати од западнонилска треска се искачил на осум и оценуваат дека институциите задоцниле со превентивните мерки, вклучително и со прскањето против комарци.
„Осум жртви од западнонилска треска и осум недели без извештај за водата во Гостивар“, наведуваат од СДСМ, правејќи паралела меѓу двете здравствени состојби.
Според опозициската партија, во двата случаи се повторува, како што велат, ист модел на постапување – задоцнета реакција, институционален хаос, молк и отсуство на одговорност.
Од СДСМ посочуваат дека со недели предупредувале оти превенцијата од западнонилската треска доцни, а како пример ги наведуваат прскањето против комарци и другите системски мерки за заштита на населението.
Партијата тврди дека паралелно со зголемувањето на бројот на заболени и починати, не е утврдена одговорност за пропустите.
СДСМ го поврзува случајот и со здравствената состојба во Гостивар, каде што, според нив, околу 5.000 граѓани побарале медицинска помош, а осум недели подоцна јавноста сè уште го нема целосниот извештај за квалитетот на водата.
„Што кријат Мицкоски и Клековски осум недели?“, прашуваат од СДСМ.
Од партијата додаваат дека последиците од, како што го нарекуваат, нефункционалниот систем ги чувствуваат граѓаните, преку нарушеното здравје, а во случајот со западнонилската треска и преку загубени човечки животи.
