830 таблети за учениците од Аеродром: Продолжува проектот „Таблет за секое дете“

Учениците од четврто одделение во Општина Аеродром добија нови таблети што ќе ги користат во наставата, како дел од проектот „Таблет за секое дете“, кој општината го спроведува петта година по ред.

— реклама —

Таблетите денеска им беа поделени на учениците во ООУ „Љубен Лапе“ од страна на градоначалникот на Општина Аеродром, Дејан Митески, и министерката за образование и наука, Весна Јаневска.

— реклама —

За годинешната реализација на проектот, Општина Аеродром обезбеди 830 таблети, со што, како што посочуваат од општината, продолжуваат вложувањата во дигитализацијата и подобрувањето на условите за образование во основните училишта.

„Современото образование бара примена на нови технологии и создавање услови за поквалитетна и интерактивна настава приспособена кон потребите на учениците. Токму затоа, покрај таблетите, обезбедивме и 7.500 бесплатни училишни униформи за сите ученици, а во соработка со Министерството за образование и наука, и бесплатни учебници“, изјави Митески.

— реклама —

Покрај таблетите, училиштата на територијата на Општина Аеродром континуирано се опремуваат со современа технологија и опрема, со цел подобрување на условите за реализација на наставата и стекнување знаења и вештини потребни за современото општество.

Од Општина Аеродром велат дека со континуираните вложувања во образованието се создаваат современи и инклузивни училишта приспособени на потребите на новите генерации.