Русија планира да протера 13 американски и полски дипломати како одговор на протерувањето десет руски дипломати од САД и тројца од Полска, објави рускиот министер за надворешни работи Сергеј Лавров. Русија исто така реципрочно воведе санкции против САД, пренесува Интерфакс.
Лавров рече дека Русија ќе ги ограничи активностите на американските организации и фондации што се мешаат во нејзините внатрешни работи. Дипломатските мисии на САД во Русија ќе бидат значително намалени, рече рускиот министер за надворешни работи и осум американски дипломати нема да можат да влезат во земјата. Нивните имиња ќе бидат објавени подоцна.
Лавров го повика американскиот амбасадор во Русија Џон Саливан да се врати во Вашингтон на консултации. Москва претходно го повлече својот амбасадор Анатолиј Антонов од главниот град на САД. Овие потези доаѓаат како одговор на дипломатската и финансиска офанзива на Вашингтон против руски официјални лица и компании, во врска со наводното руско мешање во изборите во САД и хакерски случаи.
САД протераа 10 руски дипломати и воведоа санкции за неколку десетици лица и организации. Меѓу нив има шест руски технолошки компании што соработуваат со разузнавачките служби.
Извор/фото:Агенции
