Европските берзи благо пораснаа, инвеститорите претпазливи за високите цени на нафтата
На европските берзи цените на акциите благо пораснаа во четвртокот наутро, по падот еден ден претходно, и се тргуваше внимателно додека инвеститорите го следат развојот на настаните во Украина пред продолжувањето на мировните преговори меѓу земјата и Русија. Индексот STOXX 600 на водечките европски акции беше во плус 0,2 отсто во 9.30 часот.
Лондонски FTSE индекс се зголеми за 0,14 отсто, на 7.589 поени, додека франкфуртски DAX порасна за 0,70 отсто, на 14.707 поени, а париски CAC 0,42 отсто, на 6.769 поени. Индексите пораснаа и покрај големиот пад на цените на акциите во енергетскиот сектор поради падот на цената на нафтата за повеќе од 3 отсто.
Индексот STOXX 600 е на пат да заработи во март, но поради падот во претходните два месеци, моментално е со загуба од околу 5,5 отсто во првиот квартал. Тоа ќе биде негов прв пад по седум квартали од растот. И на азиските берзи цените на акциите утринава паднаа, па MSCI берзанскиот индекс MSCI, без јапонскиот, беше во минус од 0,3 отсто околу 9.30 часот.
На токиската берза индексот Никеи падна за 0,7 отсто, додека цените на акциите во Австралија, Шангај и Хонг Конг паднаа меѓу 0,2 и 0,8 отсто. Во Јужна Кореја, пак, пораснале за 0,4 отсто. Повеќето азиски пазари го следат вчерашниот пад на Волстрит, прв по четири дена раст. Dow Jones падна за 0,19 отсто, додека S&P 500 се лизна за 0,63 отсто, а Nasdaq индексот 1,21 отсто.
Откако тие индекси драстично пораснаа еден ден претходно, благодарение на веста дека Русија вети дека драстично ќе ги намали воените операции околу Киев во мировните преговори и Украина предложи неутрален статус, индексите изгубија дел од своите придобивки вчера.
Инвеститорите претпазливи за високите цени на нафтата
Руската армија продолжи да бомбардира периферијата на Киев, а Украина вели дека Русија се подготвува за нова офанзива на истокот на земјата. Инвеститорите се претпазливи и со високите цени на нафтата, што може дополнително да ја поттикне инфлацијата, која веќе е на највисоко ниво во последните 40 години во САД, близу 8 проценти.
За да ја ограничи инфлацијата, Федералните резерви на САД неодамна ги зголемија клучните каматни стапки за прв пат од 2018 година, за 0,25 процентни поени, а може да ги зголеми за дополнителни 0,50 процентни поени веќе во мај.
„Вчерашниот пад на Волстрит се должи на ризиците од инфлација и прашањата за тоа што ќе направи американската централна банка. Од друга страна, во последните 24 часа пазарите реагираа со внимателен оптимизам на развојот на настаните во Украина, каде ситуацијата и понатаму е многу несигурна“, Рече Роб.Карнел, економист во ИНГ.
Кинеските берзи утрово паднаа и поради знаците за забавување на тамошната економија. Според официјалните податоци, индексот на индустриската активност падна на 49,5 поени во март од 50,2 поени еден месец порано.
