Премиерот Димитар Ковачевски, заедно со министерот за економија, Крешник Бектеши, и в.д. директорот на Државниот пазарен инспекторат, Горан Трајковски, денеска ја посети компанијата „Алма М“. Ковачевски, Бектеши и Трајковски со менаџментот на компанијата разговараа за новите владини одлуки за намалување на цените на над 50 призводи.
„Како Влада овозможуваме услови за подобра бизнис-клима, за поголема ликвидност на компаниите и конкурентен пазар, како и за подобри услови за работа во државата. Со новата мерка на Владата на над 50 производи во 24 категории од пекарската, млечната и од месната индустрија им ја намаливме цената за 10 проценти во однос на цената што ја имале на 1 август. Со оваа одлука и мерка кај одредени категории и производи веќе има намалување на производите над 10 %, а кај некои намалувањето е од 30 до 40 %. Во маркетите веќе овие производи добија ознака ‘гарантирана цена’, со оваа мерка придонесуваме и покрај инфлациските притисоци, заеднички и солидарно им даваме поддршка на нашите граѓани“, рече Ковачевски.
Апелира да се почитува мерката.
„Единствено, со високо ниво на социјален дијалог за приоритетни теми ќе одговориме соодветно на намалување на инфлацијата и до крајот на годината се стремиме таа да не биде повисока од 5 % во делот на основните производи што граѓаните ги користат. Зошто го велам ова? Зголемувањето на платите од јули оваа година го надминува зголемувањето на инфлацијата, но со сите овие мерки што ги правиме, со зголемување на минималната плата за најмалку 10 % веќе од почетокот на наредната година, генерално, инфлацијата ќе биде на ниво од 8 %, а платите ќе пораснат за процент поголем од нивото на инфлацијата. И оваа есен и зима ќе продолжиме во оваа насока, не се откажуваме од зголемување на платите, не се откажуваме од инвестициите во енергетиката и во инфраструктурата“, рече Ковачевски.
Увери дека нема да има никаков ценовен шок за граѓаните во делот на снабдувањето со електричната енергија.
„Веќе правиме напори да се обезбеди сè што е потребно и за непречено снабдување со топлинска енергија за градот Скопје со оглед на хаваријата што се случи на мостот ‘Беласица’ во текот на минатите месеци и на која во моментот се работи. Сè додека јас сум премиер, како Влада нема да престанеме да работиме на подобрување на егзистенцијалното прашање на граѓаните во Северна Македонија, како и на економскиот раст на државата“, порача Ковачевски.
