Макрон го именуваше новиот премиер на Франција
Францускиот претседател Емануел Макрон го назначи Мишел Барние за нов премиер на земјата, соопшти кабинетот на претседателството.
Барние (73) ги водеше преговорите на ЕУ со Велика Британија за нејзиното излегување од блокот од 2016-2021 година.
Пред тоа, конзервативниот политичар беше во различни француски влади, а беше и еврокомесар.
Пред ангажманот во Брисел, Барние беше пратеник во францускиот парламент, каде првпат беше избран во 1978 година, а беше и министер во владите на премиерите Едуар Баладир, Ален Жипе, Жан-Пјер Рафарен и Франсоа Фијон.
Тој беше избран за пратеник во Европскиот парламент во 2009 година.
Иако не постои гаранција дека владата на Барние ќе успее да ги усвои реформите во парламентот, екстремно десничарското Национално собрание (РН) претходно во четвртокот сигнализираше дека нема веднаш да го отфрли Барние доколку тој исполни одредени услови.
Барние има либерална ориентација и е Европеец како Макрон, па на тоа се гледа како на своевидно продолжување на политиката на коалицијата околу претседателот која загуби на претходните парламентарни избори.
Долгоочекуваното соопштение доаѓа приближно два месеци откако ниту една партија не освои целосно мнозинство на предвремените избори, што доведе до ќор-сокак во разговорите за тоа кој треба да ја води владата.
