Адеми: „Затворање паралелки, само девет Албанци во полицијата и величење на Младиќ – тоа е ВЛЕН“

Генералниот секретар на Демократската унија за интеграција (ДУИ), Арбер Адеми, денеска упати остри критики до коалицијата ВЛЕН, обвинувајќи ја за, како што наведува, низа постапки насочени против Албанците и принципот на еднаквост.

Адеми во објава наведува пет случувања за кои тврди дека се случиле само во текот на денешниот ден. Како прво го посочува затворањето на паралелката на албански јазик во училиштето „Пенко“ во Бутел, иако, според него, интересот од учениците Албанци е голем, додека се дозволуваат паралелки со по два, четири или шест ученици.

— реклама —

Како втор пример Адеми го наведува приемот во Академијата за полицајци. Според неговата објава, од 310 примени кандидати, само девет се Албанци.

— реклама —

Тој се осврнува и на српската партија која е партнер на ВЛЕН во Владата, обвинувајќи ја дека го велича Ратко Младиќ, кој е осуден за геноцид и злосторства против човештвото. Адеми посочува дека ВЛЕН гласал за заедничка влада со оваа партија.

Во продолжение, тој го споменува и директорот на Агенцијата за остварување на правата на заедниците, за кого тврди дека ги величал Ратко Младиќ, Дража Михаиловиќ и други личности за кои Адеми вели дека се поврзани со истата идеологија. Според него, токму ВЛЕН го именувал директорот на оваа институција.

— реклама —

„За „Српскиот свет“ веќе немаме потреба од објаснувања. Гледаме секој ден колку далеку навлегол и колку многу контролира“, напиша Адеми.

Тој оценува дека сите овие случувања претставуваат, како што наведува, „понижувања“ и удари врз Албанците и принципот на еднаквост, а политичката одговорност ја лоцира во ВЛЕН.

— реклама —

„Ова е она што ни го продадоа како „промена“. Промена за кого? Бидејќи за Албанците денес гледаме само затворање на паралелки, неправедна застапеност, величење на злосторници и молк на ВЛЕН“, наведува Адеми.

„Еден ден. Пет докази. Еден одговорен. ВЛЕН“, заклучува генералниот секретар на ДУИ.