Одбраната на Дејан Јованов-Деко, првообвинет во судскиот процес за пожарот во дискотеката „Пулс“ во Кочани, подготвува гаранција со која ќе бара неговото присуство во понатамошниот тек на судењето да биде обезбедено без притвор, изјави неговата адвокатка Ивана Коцевска.
Јованов може да остане во притвор најдоцна до 3 октомври годинава, кога истекува максималниот законски рок од една година од оценката на обвинителниот акт.
Коцевска вели дека одбраната подготвува гаранција токму за да се обезбеди дополнителна сигурност дека обвинетиот ќе биде достапен за судот во текот на понатамошната постапка
„Заради поголема сигурност дека ќе биде достапен во текот на натамошната постапка, одбраната подготвува гаранција со која ќе се даде поголема сигурност“, рече Коцевска.
Таа истовремено изнесе сомнеж дека се прават обиди да се пронајде основа поради која Јованов би останал во притвор и по истекот на законскиот рок.
„Јас добивам впечаток дека има притисок да се најде што било за притворот да се продолжи. Тука притворот по сила на закон не може да продолжи, така предвидува законот, одбраната не е виновна за тоа“, рече Коцевска.
Според неа, гаранцијата би била доволна мерка за да се обезбеди присуството на Јованов во обемниот судски процес.
„За да не се злоупотребат правата на обвинетиот, за да измислат нешто ново, а и за да не се доведеме до тоа да не се спроведе фер постапката која ја бараме, мислам дека гаранцијата би била доволна за да се истера целиот процес, кој е обемен, а и тоа не е по вина на одбраната“, изјави Коцевска.
Основниот кривичен суд Скопје претходно за „Скопје1“ потврди дека притворот на Јованов е продолжен до 3 октомври 2026 година. Обвинителниот акт во предметот бил оценет на 3 октомври 2025 година, а според законското ограничување, притворот во оваа фаза може да трае најмногу една година од оценката на актот.
„Мерката притвор, определена против првообвинетиот Дејан Јованов, од страна на кривичниот совет е продолжена до 03.10.2026 година, имајќи предвид дека Обвинителниот акт е оценет на 03.10.2025 година и согласно законските одредби мерката притвор може да трае до најмногу една година од оцената на актот“, соопштија претходно од Кривичниот суд за „Скопје1“.
По истекот на овој рок, според информациите што Судот ги достави до „Скопје1“, треба да бидат определени други мерки за обезбедување на присуството на Јованов во понатамошната постапка.
Дејан Јованов-Деко е првообвинет во судскиот процес за пожарот во дискотеката „Пулс“ во Кочани, во кој загинаа 63 лица.
