Мајка на загинато момче од „Пулс“: „Не ни требаат нови ветувања по нови погреби, туку институции што ќе ги штитат животите“

„Докога ќе ги броиме жртвите, а ќе ги чекаме одговорните?“ – праша Валентина Христовска, мајка на починатиот Павел, обраќајќи им се на присутните на денешниот марш пред полицијата.

Таа порача дека семејствата повторно маршираат со истата болка и барање за вистина, одговорност и правда, но дека нивната борба не се однесува само на 63-те загинати во пожарот во дискотеката „Пулс“ во Кочани, туку и на сите невини жртви од трагедиите што ја потресоа Македонија.

— реклама —

Христовска ги спомена несреќата кај Ласкарци, пожарот во модуларната болница во Тетово, трагедијата со автобусот на „Беса Транс“ и пожарот во „Пулс“, посочувајќи дека во овие настани животот го загубиле вкупно 138 лица, а повеќе од 200 биле повредени во Кочани.

Во своето обраќање таа потсети и на жените и девојките чии животи биле насилно прекинати, меѓу кои Танкица од Кочани, Росица од Велес, Емилија од Штип, Рамајана од Шуто Оризари, Ивана од Скопје и 17-годишната Биљана од Горданци. Апелираше институциите да реагираат навреме на пријавите за насилство и да ги заштитат жените пред да биде предоцна.

— реклама —

Осврнувајќи се на трагедијата во „Пулс“, Христовска потсети на јавните тврдења за долгогодишни институционални пропусти и ветувањата дека сите вмешани ќе одговараат. Таа праша дали се испитани пропустите, дали се спроведени внатрешни контроли и дисциплински постапки и каде се резултатите од најавената одговорност.

— реклама —

„На нас, семејствата, не ни се потребни нови ветувања. Потребни ни се одговори, конкретни постапки и видливи резултати“, порача таа, нагласувајќи дека човечкиот живот не е статистика, а болката на семејствата не смее да биде тема само за една прес-конференција.

Во емотивниот дел од говорот, Христовска зборуваше за загубата на своето дете и за болката со која живеат родителите по трагедијата.

„Нашите деца нема да се вратат. Нема да се вратат ниту жените чии животи беа одземени, ниту другите невини жртви. Но нивната загуба мора да биде опомена за секој што носи одлуки, потпишува дозволи, врши контроли или прима пријава за насилство“, рече таа.

— реклама —

На крајот порача дека семејствата не сакаат нови споменици и нови погреби, туку институции што ќе ги штитат животите.

„Не ни докажувајте со зборови дека човечкиот живот ви е приоритет. Докажете го со дела додека луѓето се сè уште живи. Бараме правда за Кочани, бараме правда за сите невини жртви. Бараме одговорност, а не ветувања“, порача Христовска.