Адвокатот Умејр Мухамеди излезе со серија тешки обвинувања на сметка на Изет Меџити, актуелен политички противник на ДУИ, притоа споредувајќи го неговиот третман од институциите со постапката против поранешниот вицепремиер Артан Груби.
Мухамеди преку повеќе прашања изнесува тврдења за наводен непотизам, криминални структури, приватизирање институции и постоење кривични пријави против Меџити. Станува збор за тврдења на адвокатот, а не за факти утврдени со правосилна судска одлука.
„Дали знаете дека Изет Меџити е еден од најинкриминираните политичари во историјата на Македонија? Дали знаете дека Изет Меџити лично и директно е виновен за уништување и гетоизацијата на една цела урбана скопска општина?“, пишува Мухамеди.
Тој понатаму го обвинува Меџити за непотизам, тврдејќи дека членови на неговото потесно семејство и опкружување биле или се на високи државни функции, а изнесува и тврдење дека го „приватизирал“ Универзитетот „Мајка Тереза“.
Мухамеди тврди и дека против Меџити постојат „неколку сериозно одржани кривични пријави“ за штета поголема од 252 милиони евра, како и дека радикални и криминални структури во Чаир биле под негова закрила. Во објавата изнесува тврдење и за „Топлификација Север“, наведувајќи дека била приватизирана од луѓе блиски до Меџити.
Адвокатот го отвора и прашањето за прислушуваните разговори, познати како „бомби“, тврдејќи дека Меџити бил единствениот за кого не бил објавен ниту еден разговор.
На крајот, Мухамеди прави директна споредба со случајот на Артан Груби и прашува зошто институционалниот третман на двајцата политичари е различен.
„Која е логиката Артан Груби, кој бил во функции само четири години, да биде во притвор веќе над шест месеци, најдолго од сите од минатата власт, додека пак Изет Меџити, кој 24 години е во функции на самиот врв на пирамидата, да биде на слобода?“, прашува Мухамеди.
Груби е осомничен во истрагата поврзана со Државна лотарија и, по доброволното враќање во Македонија, му беше определен куќен притвор.
