Адвокатот Умејр Мухамеди тврди дека денеска околу пладне бил запрен и вербално нападнат од лице во автомобил додека се движел пеш по булеварот „Крсте Мисирков“, во близина на Апелациониот суд во Скопје.
Според неговата објава, возило „Голф“ му свирнало, по што едно од лицата во автомобилот го отворило прозорецот и му дофрлило дека „многу зборува против Албанците на Фејсбук“, повикувајќи го да дојде до нив.
Мухамеди вели дека ова не е првпат да добива навреди и закани поради своите јавно изнесени ставови.
„Да може некој среде центар на град да те застанува само бидејќи зборуваш дека сите етнички заедници треба да го почитуваат знамето на државата, тоа го има само кај нас“, напиша Мухамеди.
Тој во објавата ја поврзува ваквата атмосфера со политичките состојби во земјава и оценува дека дел од политичарите дозволиле јавниот простор да стане место за притисоци и закани кон луѓе со различни ставови.
„Во нормална држава еден уличар не би се осмелил в лице да те гледа, а не да те застанува и да ти се заканува“, наведува Мухамеди.
Адвокатот притоа упати и политички критики кон поранешниот премиер Зоран Заев и актуелниот премиер Христијан Мицкоски, обвинувајќи ги дека придонеле за атмосфера во која, според него, се толерира вакво однесување.
Во објавата не се наведува дали настанот е пријавен во полицијата, ниту дали лицата кои наводно го запреле се идентификувани.
