Адвокатот Умејр Мухамеди преку објава на социјалните мрежи тврди дека при посета на угостителски објект во Старата скопска чаршија не добил фискална сметка, иако ја побарал, туку му била доставена рачно напишана пресметка.
Во објавата тој наведува дека ваквата практика, според него, е незаконска и навредлива кон потрошувачите, оценувајќи дека не треба да се дозволува различна примена на законските обврски.
„Не може од едната страна на Вардар да се издаваат фискални сметки, а од другата страна да се добива ваква пресметка“, напиша Мухамеди.
Тој додава дека во Старата скопска чаршија има и угостителски објекти што редовно издаваат фискални сметки, поради што, според него, не е фер кон оние што работат согласно прописите да се толерираат вакви практики.
Во следна објава, Мухамеди се осврна и на реакциите што ги добил на социјалните мрежи. Тој наведе дека дел од коментарите ја релативизирале важноста на фискалната сметка, додека други, како што тврди, содржеле лични навреди и обвинувања поврзани со етничка припадност.
На крајот од објавата, адвокатот оцени дека е потребно доследно почитување на законите и поефикасно функционирање на институциите.
Тврдењата се изнесени во објави на социјалните мрежи на адвокатот Умејр Мухамеди. Во нив не е содржан став од угостителскиот објект или од надлежните институции.
