Адвокатот Јовица Страшевски, бранител на Љупчо Палевски, ја оцени како правно контрадикторна одлуката на Апелациониот суд Скопје, со која беа потврдени доживотните казни за четворица обвинети во случајот „Убиството на Вања и Панче“, додека ослободителниот дел од пресудата за Александар Ѓорчевски беше укинат и вратен на повторно судење.
Според Страшевски, недозволиво е во иста кривична постапка, со ист обвинителен акт и ист доказен материјал, за еден обвинет пресудата да биде укината, а за останатите да биде потврдена.
„Како бранител на Љупчо Палевски, сметам дека одлуката на Апелациониот суд е правно контрадикторна и отвора сериозни дилеми во однос на доследната примена на законот. Недозволиво е во една единствена кривична постапка, која се однесува на ист кривично-правен настан, ист обвинителен акт и ист доказен материјал, за еден обвинет пресудата да биде укината поради утврдени недостатоци, а за останатите да биде потврдена како правилна и законита“, наведува Страшевски.
Тој додава дека доколку постојат суштински повреди или погрешно утврдена фактичка состојба што налагаат повторно судење за еден обвинет, тогаш се поставува прашањето како истиот доказен материјал може да биде доволен за правосилна осуда на останатите обвинети.
„Таквиот пристап е правно тешко одржлив и создава сериозен ризик од различно вреднување на идентичен доказен материјал“, вели адвокатот.
Страшевски најавува дека одбраната ќе ги искористи сите домашни и меѓународни правни средства за заштита на правата на Палевски и обезбедување правично судење.
Воедно, тој смета дека медиумскиот притисок и понатаму има влијание врз постапката.
„Сметав дека конечно ќе имавме одлука без медиумски притисок, но за жал, наметнатиот медиумски притисок и предвремената осуда продолжуваат да бидат одлучувачки фактори наспроти доказите во многу случаи, па и во овој. Останува да ја чекаме пресудата и да ги видиме образложението и наводите во неа“, додава Страшевски.
