Екипите на ЈП за комунални дејности на Општина Аеродром секојдневно се на терен и работат на одржување на хигиената и уредувањето на јавните површини во општината, соопштуваат од Општината.
Активностите опфаќаат косење на тревниците, чистење и уредување на улиците и пешачките патеки, собирање отпад, како и средување на дрвјата и гранките на повеќе локации. Паралелно продолжува и расчистувањето на дивите депонии.
Од општината посочуваат дека екипите континуирано интервенираат на локациите каде што има потреба, со цел создавање почиста, поуредна и поздрава животна средина за жителите.
Во тек е и поставување нови и обновување на постојните клупи за седење, додека се реконструираат и детските и спортските игралишта. Со овие активности, како што наведуваат од Општина Аеродром, се создаваат подобри услови за игра, спорт и рекреација.
Градоначалникот на Општина Аеродром, Дејан Митески, апелира до граѓаните одговорно да го одлагаат отпадот и да не создаваат диви депонии, нагласувајќи дека чистотата е заедничка одговорност.
„Чист и уреден Аеродром е заедничка грижа и придобивка за сите нас. Општината и комуналните служби продолжуваат секојдневно да работат на терен, но за трајно и одржливо решение е неопходно и одговорно однесување од секој поединец“, посочува Митески.
За граѓаните кои имаат поголемо количество отпад од своите домови, ЈП за комунални дејности на Општина Аеродром овозможува негово преземање и правилно депонирање во ЈП „Дрисла“, со минимален паричен надомест.
