Случајот со осудениот американски сексуален престапник Џефри Епстин отвора сериозни прашања во Норвешка, каде што парламентот денеска започнува јавни сослушувања за неговите контакти со норвешки политичари и дипломати.
Пред парламентарниот Одбор за надзор и уставни прашања ќе сведочат 11 актуелни и поранешни министри за надворешни работи и меѓународен развој. Меѓу нив е и премиерот Јонас Гар Стере, кој беше министер за надворешни работи од 2005 до 2012 година. Стере изјавил дека немал никакви врски со Епстин.
На сослушувањето ќе се појави и поранешниот норвешки министер за надворешни работи Берге Бренде. Тој поднесе оставка од функцијата претседател и извршен директор на Светскиот економски форум по објавувањето информации за неговите пријателски односи со Епстин.
Бренде изјавил дека кога го запознал Епстин во 2018 година, не бил запознаен со неговото минато и криминалните активности, додавајќи дека жали што не направил подетална проверка.
Претседателот на парламентарниот одбор, Јонас Андерсен Сајед, изјавил дека Владата треба да објасни што презема за повторно да се воспостави довербата во дипломатската служба. Тој посочил дека одредени лица покажале „многу лоша проценка“ во односите со Епстин.
Во меѓувреме, норвешката полиција ги истражува поранешниот премиер Торбјорн Јагланд, поранешниот министер Тере Ред-Ларсен и поранешната дипломатка Мона Јул поради сомневања поврзани со корупција. Сите ги негираат незаконските постапки.
Ред-Ларсен претходно се извини поради блиските врски со Епстин, меѓу кои била и лична позајмица што ја добил од него.
Норвешкиот парламент формираше и независна комисија составена од стручњаци од академската и правната област, која треба да ги разгледа случаите и прашањата отворени по објавувањето на документите.
Комисијата ќе опфати повеќе од три децении од историјата на норвешката дипломатија, а нејзините наоди се очекува да бидат објавени на почетокот на 2028 година.
