Две поранешни ученички го обвинија Џефри Епстин за сексуално вознемирување додека посетувале престижно уметничко училиште во американската сојузна држава Мичиген, покажува независна истрага што открила и десетици други случаи на наводна сексуална злоупотреба во оваа образовна установа.
Истрагата била спроведена во Центарот за уметности „Интерлохен“, кој организира летен камп и училиште за сценски уметности за ученици од целиот свет. Во 2024 година, раководството ангажирало адвокатска канцеларија за да ги испита пријавите за сексуално злоставување од страна на професори и вработени, а подоцна истрагата била проширена и на улогата на Епстин.
Според извештајот, биле собрани сведоштва од 70 поранешни ученици, кои изнеле обвинувања против 47 поранешни професори и вработени. Пријавите се однесуваат на период од 1950-тите до 2010-тите години, при што најголемиот број случаи се случиле пред 2000 година.
Двете жени што го споменуваат Епстин тврдат дека тој имал несоодветен физички контакт со нив додека бил поврзан со училиштето. Една од нив изјавила дека инцидентот се случил во објект што во тоа време го носел неговото име, додавајќи дека тој намерно се триел од неа и подоцна ѝ платил патување во Њујорк. Другата сведочела дека му масирала грб во неговиот дом, каде што, според неа, тој побарал да го соблече горниот дел од облеката.
Џефри Епстин бил поранешен посетител на кампот во 1967 година, а меѓу 1990 и 2003 година донирал повеќе од 400.000 долари на училиштето. По неговата пресуда за сексуални кривични дела во Флорида во 2008 година, училиштето го отстранило неговото име од една од зградите, која подоцна била урната.
Раководството на училиштето соопшти дека сите имиња на лицата опфатени во извештајот ги доставило до надлежните органи за понатамошно постапување. Истовремено упати јавно извинување до сите поранешни ученици кои претрпеле злоупотреба, нагласувајќи дека денес институцијата има значително построги безбедносни политики и механизми за заштита на учениците.
Епстин почина во затвор во 2019 година, додека неговата долгогодишна соработничка Гислејн Максвел во 2021 година беше осудена за трговија со луѓе заради сексуална експлоатација.
