Нов извештај за Епстин: Поранешна мисица тврди дека Трамп брутално ја силувал во хотел

Демократите во Одборот за правосудство на Претставничкиот дом на американскиот Конгрес објавија извештај на 52 страници во кој изнесуваат тврдења за наводна директна вмешаност на Доналд Трамп во сексуалните злоупотреби поврзани со Џефри Епстин. Во документот тие го обвинуваат и американското Министерство за правда дека со години прикривало докази и криело важни документи од јавноста и Конгресот.

Извештајот, насловен „Одредени работи ни се заеднички, Џефри…“, ги анализира исказите на 11 жени. Пет од нив, според документот, директно го обвинуваат Трамп за тешки сексуални престапи во присуство на Епстин или во неговото друштво. Демократите побарале именување на независен специјален обвинител кој би ги истражил врските на Трамп со починатиот Епстин, можните соучесници и постапувањето на правосудните органи. Наводите досега не довеле до покренување кривична постапка против Трамп.

— реклама —

Меѓу најсериозните тврдења е исказот на Беатрис Којл, поранешна швајцарска натпреварувачка на избори за убавина, која тврди дека Трамп насилно ја силувал во ноември 1993 година, во апартман во њујоршкиот хотел „Плаза“, за време на натпреварувањето „Американ дрим“. Според нејзиниот исказ, претходно истиот ден ѝ пришол Епстин и се претставил како „најдобриот пријател на Дон“. Во извештајот се наведува дека таа претходно го опишувала настанот како обид за силување што успеала да го спречи, но не се објаснува причината за промената во нејзиниот исказ.

Демократите се повикуваат и на интерни досиеја на ФБИ од истрага во 2007 година, во кои Трамп и Епстин наводно се поврзуваат со категоријата за искористување малолетници. Свиркачите тврдат дека дел од документите незаконски биле задржани од истражителите.

— реклама —

Во извештајот се споменува и испрашувањето на Гислен Максвел во 2025 година, кога, според демократите, тогашниот заменик јавен обвинител Тод Бланш трипати го пренасочувал разговорот при споменување на жртва заведена под псевдонимот „Џејн“. Епстин наводно ја одвел девојката кај Трамп на неговиот имот Мар-а-Лаго кога имала 14 години.

— реклама —

Документот ја доведува во прашање и изјавата на Трамп дека го отстранил Епстин од својот клуб на Флорида затоа што бил „одвратен“. Според извештајот, во документ од 2009 година Трамп изјавил дека од Епстин никогаш не било побарано да го напушти клубот, што го потврдил и тогашниот управител на Мар-а-Лаго.

Се наведува и исказ од поранешна асистентка на Епстин, според која токму тој го запознал Трамп со неговата сегашна сопруга Меланија. Тоа е спротивно на досегашната верзија дека ги запознал модниот агент Паоло Замполи. Во извештајот се споменува и манекенка заведена под псевдонимот „Кејт“, која тврди дека Максвел ја запознала со Трамп на забава во Њујорк и им договорила средба. Таа не го обвинила Трамп за несоодветно однесување. Според официјалните податоци, Трамп летал со авионот на Епстин најмалку осум пати меѓу 1993 и 1996 година.

Белата куќа ги отфрли сите обвинувања, оценувајќи дека извештајот е очаен обид на демократите да го одвлечат вниманието на јавноста од успесите на републиканците. Портпаролката Лорен Бис повтори дека Трамп го отстранил Епстин од својот клуб и дека е ослободен од каква било вина поврзана со него.

Објавувањето на извештајот се случува во пресрет на изборите за американскиот Конгрес, а демократите ги претворија врските со Епстин во една од главните теми во кампањата. Иако истрагите потврдиле дека Епстин злоупотребувал повеќе од илјада жртви пред да почине во затвор во 2019 година, досегашните официјални проверки не утврдиле докази за постоење инкриминирачка „листа на клиенти“, ниту основа за покренување кривична постапка против Трамп.