Србија од почетокот на 2026 година еутаназирала повеќе од 27.000 свињи поради ширењето на африканската свинска чума, потврди српскиот министер за земјоделство Драган Гламочиќ.
Поради појавата на болеста, во Рума, Обреновац и Сремска Митровица е прогласена вонредна состојба, а властите најавуваат дека истата мерка наскоро би можела да биде воведена и во други општини.
Гламочиќ изјави дека најголем број жаришта се регистрирани на подрачјата на Сремскиот и Мачванскиот округ, како и на територијата на Белград, каде што има голем број одгледувачи на свињи. Тој предупреди дека проблем претставува и тоа што дел од одгледувачите ги пуштаат животните надвор од фармите, иако тоа е забрането.
Министерот најави засилени инспекциски контроли и построги казни, а од одгледувачите побара доследно да ги почитуваат биосигурносните мерки, да вршат редовна дезинфекција и веднаш да ги пријавуваат првите симптоми на болеста.
Поради актуелната состојба, во Владата на Србија за денеска е закажан кризен состанок, на кој ќе учествуваат претставници на повеќе институции, со цел да се усвојат нови мерки за спречување на натамошното ширење на африканската свинска чума.
Според официјалните податоци, заклучно со 9 јули, болеста е потврдена кај домашни свињи на 496 фарми во 18 општини и осум управни окрузи. На сопствениците на еутаназираните животни досега им се исплатени повеќе од 211.000 евра како обесштетување.
