Седум лица биле лишени од слобода во изминатото деноноќие на повеќе локации во Скопје и Струмичко, откако кај нив била пронајдена дрога, информира Министерството за внатрешни работи.
Како што соопшти МВР, на 21 и 22 јуни во Скопје, полициски службеници од СВР Скопје на различни локации ги привеле К.Р. (34), А.Р. (19), М.Р. (21), М.К. (37), сите од Скопје, како и Т.Б. (28) од скопското село Волково и А.А. (37) од селото Сингелиќ.
При извршените контроли, кај нив биле пронајдени и одземени грутчеста материја, прашкаста материја и марихуана.
Во одделен случај, на 20 јуни, полициски службеници од СВР Струмица го лишиле од слобода С.К. (33) од струмичкото село Бориево.
При претрес во неговиот дом, извршен по судска наредба, во дворот биле пронајдени две засадени стебла од растението канабис. Дополнително, лицето доброволно предало уште три стебла канабис, кои, според полицијата, ги засадил на друга локација во атарот на селото Бориево.
За случајот бил известен јавен обвинител од Основното јавно обвинителство Струмица.
Од МВР информираат дека по целосното документирање на сите случаи, против лицата ќе бидат поднесени соодветни поднесоци.
