СДСМ преку соопштение ја обвини власта дека целиот процес поврзан со Артан Груби се одвива под нејзина контрола, оценувајќи дека доколку тој биде ослободен, одговорноста повторно ќе се обиде да се префрли врз опозицијата.
Од партијата потсетуваат на патот на Груби од свечениот пречек, преку куќниот притвор, до можноста да биде целосно ослободен доколку обвинителството не поднесе обвинение во законскиот рок.
„Кога Груби ќе биде слободен – дали повторно СДСМ и проф. д-р Венко Филипче ќе бидат прогласени за виновни?“, прашуваат од СДСМ.
Од опозициската партија директно го обвинуваат премиерот Христијан Мицкоски за влијание врз правосудството. Тврдат дека тој јавно предлага обвинители, ги дискредитира оние што не му одговараат, а за судии поставува свои советници, сопруги на функционери на ВМРО-ДПМНЕ и лица блиски до Сашо Мијалков.
СДСМ наведува и дека судски процеси, според нив, се нарачуваат преку собраниската говорница, медиумите и телефонски разговори.
Од партијата се повикуваат на извештајот на Европската комисија, за кој велат дека констатирал најголем политички притисок врз правосудството досега, како и на предупредувањата од невладини организации и други извештаи за наводна поврзаност меѓу власта и дел од правосудството.
„И кога Груби ќе биде слободен, сценариото е веќе напишано: виновни ќе бидат СДСМ и Филипче“, наведуваат од СДСМ.
Од партијата прашуваат и како тие биле виновни за ослободувањето на Никола Груевски и Драган Павловиќ Латас, како и за укинувањето на пресудата поврзана со враќањето на имотот на ВМРО-ДПМНЕ, познат како „Белата палата“.
Според СДСМ, станува збор за повторлив модел во кој, како што велат, кога „нивни луѓе се спасуваат“, одговорноста се префрла врз опозицијата.
„Секогаш кога системот работи по нивна нарачка – виновни се СДСМ“, се наведува во соопштението.
Од СДСМ додаваат дека граѓаните, според нив, веќе го препознаваат ваквото сценарио и најавуваат дека „доаѓа времето на вистината и правдата“.
