Актерот Владо Јовановски до судијата Ѓоко Ристов: „Мајка ти ја разбирам, ама тебе не те разбирам, зошто ја изложи на потсмев?“

Актерот Владо Јовановски, кој беше обвинет во случајот за настаните од 27 април во Собранието, упати остри критики кон апелацискиот судија Ѓоко Ристов, по сведочењата на неговите родители во судската постапка поврзана со парите пронајдени во семејната куќа во Неготино. Јовановски јавно го повика судијата да преземе одговорност, обвинувајќи го дека ги изложува своите родители на понижување за да се заштити себеси.

„Абе, ‘господине’ судија Ристов. Судија во Апелациониот суд. Инстанца која може да извади некого од притвор или да го стави таму, во ‘Шутка’. И со власт да ја поништи одлуката на првостепениот суд. Знам, мајка е мајка! ‘Пуста мајка’!“, напиша Јовановски.

Тој прашува зошто судијата дозволил неговата мајка да биде изложена на потсмев во јавноста, а притоа изнесува обвинувања за мотивите на Ристов.

— реклама —

„Зошто бе, апелациски судијо, ја изложивте својата мајка на потсмев кај многумина од граѓаните? Зошто? За да си ја спасите кожичката од затвор? Па и затворот е за луѓе. Од затвор се излегува, од гроб тешко. Мајка ти ја разбирам, ама тебе не те разбирам. Многу себично... Да си ги понижиш родителите, за да си ја спасиш кожата“, наведува актерот.

Јовановски го повикува Ристов да признае, без да прецизира на кое конкретно дело или постапување се однесува неговиот повик.

— реклама —

„Биди бе маж, признај, не ги бутај во кал родителите. Едипалски делува, вака од страна“, пишува тој.

Во објавата актерот се осврнува и на снимките од судењето, како и на однесувањето на адвокатите, тврдејќи дека нивните сугестии откриваат повеќе од изговорените зборови.

„Плус, твоите безгласни снимки од судењето и сугестиите на адвокатите, што ве советуваат тебе и твојата мамичка (која кутрата, плетела до три часот наутро за да заработи и да ги стави паричките во дупчето), зборуваат повеќе од зборови“, наведува Јовановски.

— реклама —

Во продолжение, тој се навраќа и на сопственото искуство со судството, споменувајќи го поранешниот апелациски судија Јани Нича, за кого тврди дека бил еден од тројцата судии што одлучувале за продолжување на неговиот притвор во случајот за 27 април.

„Тој беше еден од тројцата судии во апелација, кои ми го продолжуваа притворот во Шутка и притворот во домашен притвор. Со другите две, три персони можеби некогаш друг пат“, пишува актерот.

Јовановски прашува зошто бил задржан во притвор една година и тврди дека судските одлуки оставиле долгорочни последици врз неговиот живот и семејство.

„Љубопитен сум да знам, зошто ме држеа една година во притвор и зошто се обидоа да ми го уништат животот, и да ми уништат сè што правев за уметноста и за Македонија!? Зошто? Последиците ги трпам и јас, а ги трпиме и како семејство, на различни начини“, наведува Јовановски.

Објавата ја завршува со религиозна порака, најавувајќи дека за последиците од неговиот притвор ќе зборува во друга прилика.