Македонскиот глумец Владо Јовановски предлага Македонија да стане 51. сојузна држава на САД

Македонскиот театарски, филмски и телевизиски глумец Владо Јовановски предлага Македонија да стане 51. сојузна држава на Соединетите Американски Држави. Во своја објава на социјалните мрежи, тој наведува дека ваквиот потег би можел да донесе нови можности за државата, а истовремено да го зачува македонскиот идентитет.

Јовановски смета дека Македонија би можела да го задржи својот идентитет без, како што наведува, срамни и понижувачки додавки, а англискиот јазик би можел да стане дополнителен официјален јазик.

— реклама —

— реклама —

Меѓу можните придобивки што ги набројува се американски пасоши за македонските граѓани, патување без визи низ светот, нови инвестиции, избор на гувернер и примена на американското законодавство.

— реклама —

Глумецот во објавата наведува и дека ваквото решение би можело да придонесе за заштита на Македонците во соседните земји од асимилација, како и за надминување на преговорите и компромисите со Европската Унија, кои ги оценува како понижувачки.

Јовановски смета дека идејата би можела да се реализира додека Доналд Трамп е претседател на САД, оценувајќи дека тој има храброст и доволна подготвеност за таков потег.

„Ова ми изгледа многу реално, потребно и возможно. Да го искористиме времето додека е Трамп претседател на САД“, пишува Јовановски во објавата.

Тој наведува дека со ваков чекор, според неговото размислување, Македонија би можела трајно да ја промени својата иднина и да се заштити од негирање и асимилација.