Владо Јовановски: „Извинување за Ваташа е патот кон вистинско македонско-бугарско братство“

Актерот Владо Јовановски преку објава на социјалните мрежи упати порака за, како што наведува, потребата од признание, покајание и извинување за злосторствата извршени врз Македонците за време на Втората светска војна.

Во својата објава, Јовановски посочува дека вистинското помирување и братство меѓу македонскиот и бугарскиот народ може да се градат само врз искрено признавање на историските грешки.

— реклама —

„Колку ли е тешко да се покаеш и да кажеш: Извинете, многу згрешивме, виновни сме. Направивме злосторство кое е невозможно да се оправда, но се каеме и се срамиме од тоа и ве молиме да ни простите“, напиша Јовановски.

Тој како пример го посочува масакрот кај Ваташа, наведувајќи дека злосторствата извршени во тој период не треба да бидат товар за идните генерации, но дека е потребно нивно признавање и осуда.

— реклама —

Во објавата, актерот наведува дека вистинското пријателство меѓу двете земји не треба да биде условено со политички барања и уцени, алудирајќи на актуелните несогласувања поврзани со европската интеграција на Македонија.

„Нема да бараме од вас да станете Бугари за да станете дел од Европската Унија. Тоа е вистинско братство и заедништво“, пишува Јовановски.

На крајот од својата објава, тој го отвора и прашањето за меморијалниот комплекс во Ваташа, прашувајќи зошто на споменикот на убиените деца не гори вечниот оган.

— реклама —

„Зошто на споменикот на убиените деца во Ваташа не гори вечниот оган? Прашање до сите одговорни и повикани“, наведува актерот.

Објавата предизвика бројни реакции на социјалните мрежи, каде што се отвори дискусија за историските прашања и односите меѓу Македонија и Бугарија.