Албанија ќе плати 4 милиони евра за концерт на Канје Вест, Рама под силен удар на јавноста

Албанскиот премиер Еди Рама ја бранеше одлуката на Владата да издвои четири милиони евра за организација на концертот на американскиот рапер Канје Вест, кој е закажан за 11 јули во близина на Тирана.

— реклама —

Рама на Фејсбук објави дека средствата биле одобрени во последен момент за да се избегне, како што наведе, нарушување на угледот на Албанија пред околу 25.000 странски посетители од 80 земји, кои веќе купиле билети за концертот.

„Издвоивме четири милиони евра во последен момент за да не ја посрамотиме Албанија пред речиси 25.000 странски посетители, додека многумина стравуваа дека концертот ќе биде откажан“, напиша Рама.

— реклама —

Според него, концертот се очекува да донесе најмалку 100 милиони евра приходи за албанската економија, поттикнати од зголемениот број резервации во хотелите и другите туристички капацитети.

— реклама —

Настанот ќе се одржи на привремен стадион изграден специјално за концертот.

Одлуката на Владата предизвика бројни негативни реакции на социјалните мрежи. Дел од граѓаните ја критикуваа финансиската поддршка за концертот, потсетувајќи на претходните контроверзни изјави на Канје Вест, меѓу кои и пофалби за Адолф Хитлер и користење на нацистичка симболика, поради што му беше забрането настапување во повеќе европски држави.

Во меѓувреме, во Тирана повеќе од еден месец се одржуваат секојдневни протести, кои првично започнаа поради плановите за изградба на луксузен туристички комплекс на Џаред Кушнер, зетот на американскиот претседател Доналд Трамп. Подоцна демонстрантите ги проширија барањата, обвинувајќи ја Владата за корупција и барајќи оставка од премиерот Рама, обвинувања што тој ги отфрла.