Албанија воведе казни до 5.500 евра за насилство на протестите

Со парични казни до 500.000 леки, односно околу 5.500 евра, албанската влада ќе се обиде да го спречи насилството на протестите што со месеци се одржуваат во Тирана. Новиот пакет мерки предвидува санкции за непочитување на полициските наредби, прикривање на идентитетот и поттикнување насилство.

Највисоката казна ќе им биде изрекувана на лицата кои одбиваат да ја почитуваат наредбата на полицијата за растурање на собирот, а притоа го прикриваат својот идентитет. За самото покривање на лицето е предвидена казна од 10.000 до 100.000 леки. Исклучоци ќе важат кога тоа е неопходно од здравствени или религиозни причини, како и при вршење професионални задачи, меѓу кои новинарство и давање медицинска помош.

— реклама —

Со новите правила, полицијата ќе може привремено да забрани или ограничи собири во близина на образовни, здравствени и државни установи доколку постои сериозна и непосредна опасност од насилство или поголема материјална штета. Таквата мерка може да трае најмногу 72 часа, со можност за едно продолжување.

— реклама —

Предвидени се и мерки против повиците за насилство на социјалните мрежи. Полицијата ќе може да побара отстранување на спорната содржина, а доколку барањето не биде исполнето или прекршокот се повтори, ќе постапува согласно со законите.

Владата најави и надомест од државата за малите бизниси кои претрпеле штета од вандализам, грабежи или подметнати пожари за време на протестите. Дополнително, ќе биде воспоставен електронски регистар на лица кои се упатени до обвинителството или се под истрага за насилни дела извршени на јавни собири.

— реклама —

Мерките веднаш стапија во сила, но парламентот треба да ги ратификува во рок од 45 дена.

Протестите во Тирана започнаа како мирни собири против планот за изградба на луксузен хотел во заштитено природно подрачје, проект поддржан од Џаред Кушнер, зет на американскиот претседател Доналд Трамп. Кон средината на октомври, движењето се прошири и ги опфати и барањата на студентите за справување со корупцијата, подобрување на здравствениот систем и создавање подобри перспективи за младите.

Албанскиот премиер Еди Рама ги обвини „странските актери“ за насилството и ги посочи Русија и Иран во врска со ширењето дезинформации на интернет. Истовремено, тој упати повик за дијалог.