Албанската полиција со солзавец ги растера демонстрантите пред парламентот

Албанската полиција употреби водени топови и солзавец за да ги растера демонстрантите кои денеска протестираа пред парламентот во Тирана, откако дел од нив фрлаа јајца и брашно кон полицајците и пратениците, пренесува Ројтерс.

Според албанските медиуми, во судирите биле повредени тројца полицајци и еден демонстрант.

— реклама —

Протестот се одржа непосредно пред почетокот на парламентарната седница. Додека пратениците влегувале во зградата на парламентот, демонстрантите ги гаѓале со јајца, а полицијата возвратила со употреба на водени топови и солзавец.

— реклама —

Бранот протести започна пред повеќе од еден месец поради најавената изградба на луксузен туристички комплекс зад кој стои Џаред Кушнер, зет на американскиот претседател Доналд Трамп. Во меѓувреме, протестите прераснаа во пошироко незадоволство поради градежните проекти долж албанското крајбрежје.

„Протестираме затоа што бараме транспарентност. Сакаме да ја заштитиме природата. Владата е корумпирана“, изјави демонстрантот Аслан Доѓани.

— реклама —

Протестите претставуваат нов предизвик за премиерот Еди Рама, кој е на власт од 2013 година. Дел од јавноста ја обвинува неговата влада за неуспех во борбата против корупцијата и за слабости во јавните услуги, особено во здравствениот систем.

Рама на социјалната мрежа Икс порача дека „убавиот протест на граѓаните, патриотизмот и чистотата сега му отстапил место на стариот филм на судири, поделби и насилство“.

Организаторите најавија нов протест за задутре.