Министерот за здравство, Азир Алиу, по повод националната и европската недела на медицинските сестри и акушерки, ја истакна клучната улога на медицинските сестри, техничарите и акушерките во функционирањето на здравствениот систем.
Тој нагласи дека тие се вклучени во сите сегменти на здравствената заштита – од превенција и дијагностика, до рехабилитација и поддршка на пациентите и нивните семејства.
„Министерството за здравство е посветено на зајакнување на човечките ресурси во јавните здравствени установи. Реализирани се над 1.250 вработувања во јавноздравствениот сектор, од кои значителен дел се медицински сестри“, изјави Алиу на свечената академија организирана од Националното здружение на медицински сестри, техничари и акушерки – ЗМСТАМ.
Тој посочи и дека минатиот месец бил потпишан колективен договор со синдикалните организации, со кој е предвидено зголемување на платите за 7 проценти со мартовската плата, како и утврдена динамика за понатамошен раст на примањата во следниот период.
Алиу нагласи дека Министерството останува посветено на подобрување на здравствената инфраструктура, унапредување на статусот на медицинските сестри и акушерки, како и поддршка на нивното образование и професионален развој.
