Карлос Алкараз смета дека Александер Зверев во моментов е меѓу најдобрите тенисери во светот, а неговото присуство во европскиот тим го опиша како голема предност пред почетокот на Левер купот во Лондон.
„Одлично е што ќе бидеме заедно. Како што рече Зверев, а јас се согласувам со него, тој веројатно е најдобриот играч во светот во моментов. Тоа што го имаме на наша страна и во нашиот тим претставува големо оружје кое ќе се обидеме да го искористиме овој викенд“, изјави Алкараз.
Зверев во Лондон пристигнува по освојувањето на УС Опен, додека за Алкараз турнирот ќе биде само второ натпреварување по враќањето на теренот по повредата на зглобот. Шпанецот на УС Опен стигна до четвртфиналето, каде по пет сета беше елиминиран од Бен Шелтон.
„Мислам дека УС Опен беше одличен тест за мене. Едвај чекам повторно да заиграм“, рече Алкараз.
Дополнителна мотивација за Шпанецот е и поразот на Тим Европа од Тимот на светот на минатогодишниот Левер куп.
„Минатата година не успеав да го подигнам трофејот, па оваа година ќе направам сè што е потребно за да го освоиме. Се надевам дека ќе освоиме многу поени“, истакна Алкараз.
Покрај Алкараз и Зверев, за Европа ќе настапат Флавио Коболи, Рафаел Ходар, Јакуб Меншик и Каспер Руд, додека Артур Фери ќе биде резерва.
Тимот на светот ќе го предводат Алекс де Минор и Тејлор Фриц, заедно со Лернер Тиен, Брендон Накашима, Александер Бублик и Франсиско Серундоло.
Овогодишниот Левер куп ќе се игра во арената О2 во Лондон, а натпреварувањето започнува во петок.
