Алта банка е македонска банка и работи според домашните закони, порачува Гацов

Магистерот по монетарна економија Павле Гацов упати јавна порака во врска со Алта банка – Битола, нагласувајќи дека станува збор за македонска банка, регистрирана и лиценцирана според домашните прописи и под надзор на Народната банка.

— реклама —

Гацов посочува дека основачкиот капитал на банката е уплатен и не може да се повлече без спроведување на соодветна законска процедура. Депозитите во банката се средства на македонски граѓани и компании, додека одобрените кредити се наменети за македонски субјекти. Дополнително, банката работи и плаќа даноци во земјава, а нејзините вработени се македонски граѓани.

— реклама —

Тој нагласува дека промената на сопственоста не значи и промена на правниот субјект, правејќи споредба со куќа која може да смени сопственик, но останува истата.

„Некоректните политички изјава и злорадоста во некои објави треба да се анулираат со јавен став на гувернерот на НБРМ, воведување на засилен надзор над работењето на македонската АЛТА банка заради премостување на психозата предизвикана од ваквите некоректности

Се потсетив дека вакви објави имав пред неколку години кога некои политичари ја подгреваа ситуацијата за претстојна девалвација (ја утнаа работата, иако НБ мораше да интервенира на девизниот пазар), како и со став за избрзаните мерки кои без преземени кон една исто така домашна банка.

Инаку, средствата на Алта банка-Битола се поголеми од вкупните обврски на банката (депозити, камати, ...) за преку 30 милиони евра (30.09.2026). Бројките се факт.“, вели Гацов.

— реклама —

Тој предупредува дека подлегнувањето на, како што ја нарекува, хушкачката атмосфера и масовното повлекување на депозитите може да предизвика финансиски загуби за штедачите, особено поради можноста да ја изгубат претходно акумулираната камата.

„Дали овие загуби ќе им бидат покриени од злорадосните политичари и хушкачите по социјалните мрежи?“, прашува Гацов во својата реакција.