Американската компанија „Амазон“ ќе инвестира повеќе од 300 милиони евра во проширување и модернизација на својот логистички центар во германскиот град Пфорцхајм.
Компанијата очекува до крајот на 2029 година бројот на вработени во овој центар да надмине 2.000, што е речиси двојно повеќе од сегашниот број.
Со реконструкцијата, логистичкиот центар ќе биде прилагоден за складирање на помали и средни производи, наместо досегашниот фокус на поголеми артикли. Новите капацитети ќе можат да примат околу 20 милиони производи, од USB-мемории до мали апарати за домаќинство.
Во работењето ќе бидат вклучени стотици транспортни роботи кои ќе ги носат полиците до вработените, со цел да се намали потребата од движење низ магацинот и да се зголеми ефикасноста.
Од компанијата истакнуваат дека за време на реконструкцијата нема да има отпуштања и дека сите постојни работни места ќе бидат задржани. Во германската покраина Баден-Виртемберг „Амазон“ работи на десет локации и вработува околу 3.000 луѓе.
Покрај инвестицијата во Германија, компанијата повторно ја потврди намерата значително да ги зголеми вложувањата во технолошката инфраструктура, особено во областа на вештачката интелигенција. За оваа година се планирани дополнителни 20 милијарди долари, со што вкупните капитални инвестиции ќе достигнат 220 милијарди долари.
Главниот извршен директор Енди Џеси оцени дека и покрај огромните вложувања, побарувачката за компјутерски капацитети останува многу висока и би можела да ја надминува понудата и во текот на 2027 година.
Значаен придонес во растот на компанијата има и платформата Amazon Web Services (AWS), чии приходи во вториот квартал пораснале за 37 проценти и достигнале 42,2 милијарди долари. Вкупните приходи на „Амазон“ изнесувале 200,6 милијарди долари, додека нето-добивката се зголемила повеќе од трипати во споредба со истиот период лани, достигнувајќи 62,65 милијарди долари.
