„Амазон“ ја презеде првата позиција на листата Fortune Global 500, со што ја прекина долгогодишната доминација на „Walmart“ и стана компанијата со најголеми приходи во светот.
Три децении откако Џеф Безос започна да продава книги од својата гаража, „Амазон“ денес има пазарна вредност од околу 2,6 билиони долари и се подготвува за најголемиот инвестициски циклус во својата историја, насочен кон вештачката интелигенција, облачната инфраструктура и развојот на сопствени чипови.
Компанијата е основана во 1995 година како мала онлајн книжарница, а денес, покрај електронската трговија, работи и во областа на логистиката, облачните услуги, дигиталното рекламирање, филмската продукција, потрошувачката електроника и производството на чипови.
Џеф Безос за магазинот „Fortune“ изјави дека големината никогаш не била главната цел на компанијата.
„Не сакам да се гордееме затоа што сме големи. Сакам да се гордееме затоа што им служиме на клиентите“, рече Безос.
„Амазон“ планира во текот на 2026 година да инвестира околу 200 милијарди долари, најмногу во развојот на платформата AWS, центри за податоци, генеративна вештачка интелигенција и сопствени процесори.
Компанијата веќе потпиша повеќемилијарден договор со „Мета“, која ќе ги користи процесорите Graviton за развој на проекти поврзани со вештачката интелигенција.
Дополнително, „Амазон“ планира да инвестира до 25 милијарди долари во компанијата Anthropic, еден од главните конкуренти на OpenAI, додека „Anthropic“ треба да користи облачни услуги на „Амазон“ во вредност поголема од 100 милијарди долари.
Според процените што ги пренесува „Fortune“, „Амазон“ во наредните години би можел да стане првата компанија во историјата со годишни приходи од еден билион долари.
