Американската амбасадорка предизвика реакции со изјава за балканска земја

Според пишувањето на „Волстрит журнал“, американската амбасадорка во Грција, Кимберли Гилфојл, за време на приватна вечера во Атина зборувала за политичката криза во Романија и наводно изјавила дека САД можат „тоа да го направат со која било земја“, вклучително и со Грција.

Според американскиот весник, изјавата била дадена во март, на вечера на која присуствувале американски и грчки претставници. Во тој период владата на романскиот премиер Илие Болојан се соочувала со сериозна политичка криза.

— реклама —

Повикувајќи се на лице кое присуствувало на вечерата и на други лица на кои подоцна им бил прераскажан разговорот, „Волстрит журнал“ наведува дека Гилфојл, зборувајќи за можниот пад на романската влада, рекла: „Можеме да го направиме тоа со која било земја што сакаме. Можеме да го направиме тоа и овде“.

На тоа, според истите извори, министерот за животна средина и енергетика на Грција, Ставрос Папаставру, одговорил дека САД не можат да ја сменат грчката влада, бидејќи таа е избрана од грчките гласачи. Разговорот потоа станал напнат.

Сепак, самата изјава, дури и доколку е пренесена точно, не претставува доказ дека Вашингтон учествувал во соборувањето на романската влада.

— реклама —

Владата на Болојан падна на 5 мај, речиси два месеца по спорната вечера, откако романскиот парламент ѝ изгласа недоверба. Претходно, Социјалдемократската партија ја повлекла поддршката за владата, а нејзините министри ја напуштиле владејачката коалиција.

Случајот е дел од поширока приказна на „Волстрит журнал“ за активностите на Гилфојл на Балканот и нејзината улога во американските напори европските земји да купуваат повеќе американски течен природен гас.

— реклама —

Весникот наведува дека Гилфојл во изминатите месеци интензивно патувала низ Југоисточна Европа, каде што го промовирала таканаречениот Вертикален гасен коридор, преку кој американскиот течен природен гас би се транспортирал преку Грција и други балкански земји кон Централна и Источна Европа и Украина.

„Волстрит журнал“ посебно внимание посветува и на нејзините врски со Кристос Марафатсос, американски бизнисмен со грчко потекло, кој често ја придружува на средби со државни претставници.

Марафатсос воедно е лобист на грчката градежна и енергетска компанија „Актор груп“. Според весникот, тој толку често ја придружува амбасадорката што некои странски претставници го сметале за член на нејзиниот дипломатски тим, иако станува збор за приватно лице.

Адвокатот на Гилфојл го оспорил описот на разговорот објавен од американскиот весник. Тој навел дека амбасадорката преку официјалните канали соработувала со компании од целиот енергетски сектор.

Гилфојл пред дипломатската кариера била обвинителка и телевизиска водителка на „Фокс њуз“, а со години била дел од политичкиот круг околу семејството Трамп. Била свршена со Доналд Трамп Џуниор, а Доналд Трамп по победата на изборите ја именувал за американска амбасадорка во Грција.