Американски дипломати пристигнаа во Сирија за директно да разговараат со новите исламистички владетели, надевајќи се дека ќе поттикнат умерен и инклузивен пат за земјата и ќе најдат индиции за исчезнатите Американци, соопшти Стејт департментот.
Тоа е првата официјална американска дипломатска мисија во Дамаск од раните денови на бруталната граѓанска војна што избувна во 2011 година и кулминираше овој месец со ненадејна блицкриг офанзива која го собори долгогодишниот владетел Башар ал Асад.
Дипломатите ќе се сретнат со претставници на победничката група Хајат Тахрир ал-Шам (ХТС), како и со активисти, граѓанско општество и членови на малцинските групи, соопшти Стејт департментот. Вашингтон официјално ја смета групата ХТС за терористичка група.
Американските власти ќе разговараат со Сиријците за „нивната визија за иднината на нивната земја и како САД можат да ги поддржат во тоа“, изјави портпаролот на Стејт департментот.
Во делегацијата се Барбара Лиф, највисокиот функционер на Стејт департментот за Блискиот исток, и Даниел Рубинштајн, ветеран американски дипломат во арапскиот свет, сега задолжен за ангажманот во Сирија, рече портпаролот.
Ќе присуствува и Роџер Карстенс, одговорен за заложниците, кој бара индиции за исчезнатите Американци, вклучувајќи го и Остин Тајс, новинарот киднапиран во август 2012 година.
Патувањето доаѓа една недела откако државниот секретар Антони Блинкен, додека беше на турнеја низ земјите во соседството на Сирија, рече дека САД оствариле директен контакт со ХТС.
На разговорите во јорданското одморалиште Акаба, западните и арапските сили, како и Турција, во саботата заеднички повикаа на „инклузивна, несекташка и претставничка влада“ која ги почитува правата на сите различни заедници во Сирија.
ХТС има корени од Ал Каеда, поради што Соединетите Држави ја задржаа својата дистанца за време на граѓанската војна, дури и кога Вашингтон се обидуваше да го изолира посекуларниот Асад, чија семејна диктатура безмилосно го задушуваше несогласувањето веќе половина век.
