Инспектори на Меѓународната агенција за атомска енергија (ИАЕА) започнаа ископувања и истражувања на локацијата Деир ел Зур во Сирија, за која постојат сомнежи дека е поврзана со поранешната тајна нуклеарна програма на земјата.
Генералниот директор на ИАЕА, Рафаел Гроси, за време на посетата на Дамаск потврди дека тимовите веќе работат на терен и спроведуваат опсежни истражувања. Тој откри и дека е идентификувана уште една локација на која има нуклеарен материјал, но не даде дополнителни детали.
„Станува збор за неколку тони нуклеарен материјал кој би можел да биде злоупотребен. Сирија одлучи да ја отвори локацијата за инспекторите на ИАЕА“, изјави Гроси, додавајќи дека материјалот ќе биде евидентиран и ставен под меѓународниот систем на заштитни мерки.
Сомнежите за тајната нуклеарна програма на Сирија датираат од времето на поранешниот претседател Башар ал Асад. Меѓународната заедница тогаш тврдеше дека земјата развивала непријавена нуклеарна програма, вклучително и реактор во источната провинција Деир ел Зур, за кој се смета дека бил изграден со помош од Северна Кореја.
Објектот беше уништен во израелски воздушен напад во 2007 година, а Сирија потоа не одговори целосно на прашањата на ИАЕА за неговата намена и активностите на локацијата.
Новите сириски власти, предводени од привремениот претседател Ахмад ал Шара, најавија целосна соработка со ИАЕА и овозможија пристап до локациите за кои постојат сомнежи.
Сирискиот министер за надворешни работи Асад ал Шибани изјави дека Дамаск и натаму сака да развива нуклеарна програма за мирољубиви цели. Тој оцени дека материјалот, според техничките проценки, не претставува опасност и дека ќе остане под надзор на Сирија и во рамките на системот на заштитни мерки на ИАЕА.
Агенцијата уште во 2024 година земала примероци од три локации, а во 2025 година соопштила дека на една од нив биле пронајдени траги од ураниум.
