Серија силни експлозии одекнувале денеска во подрачјето на Идлиб и во близина на воениот аеродром Тафтаназ во Сирија, при што над објектот се издигнал густ чад.
Според информативната мрежа „Сирија нау“, која се повикува на очевидци, експлозиите започнале околу 8 часот наутро, во момент кога над подрачјето прелетувал извидувачки авион. На снимка што се шири на интернет се гледа густ чад што се издига од кругот на аеродромот.
Според наводите, експлозиите траеле околу час и половина. Засега нема потврдена информација за причината. Локални жители претпоставуваат дека можеби станува збор за детонација на заостанати убојни средства на аеродромот, каде што и претходно повремено се случувале слични инциденти.
Военото леталиште Тафтаназ, пред почетокот на долгогодишните воени операции во Сирија, било втор по големина хеликоптерски аеродром во земјата. Подоцна со него управувале опозициски фракции, а по договорот за деескалација, постигнат во март 2020 година меѓу Турција и Русија, објектот бил претворен во турска набљудувачка точка.
Северозападниот дел на Сирија во текот на септември беше погоден од повеќе експлозии. На 9 септември, во привремено складиште за оружје и заостанати убојни средства во Сармада, во близина на Идлиб, загинале 14 припадници на Министерството за одбрана, а повеќе лица биле повредени.
На почетокот на септември, во Биниш, пет лица загинале во експлозија на автомобил натоварен со муниција.
