Американската Служба за имиграција и царина (ICE) би можела наскоро да ги опреми своите агенти со специјални ракавици што испорачуваат електрошок. Министерството за внатрешна безбедност (DHS) планира да потроши до 20 милиони долари за нивна набавка, според службен документ објавен во понеделникот.
Станува збор за уредот GLOVE, кратенка од „Generated Low Output Voltage Emitter“, кој може да испорача напон до 380 волти. Најавата веднаш предизвика загриженост кај организации за заштита на граѓанските права, особено поради критиките со кои ICE веќе се соочува поради начинот на кој спроведува имиграциски операции.
Од DHS за Би-Би-Си изјавиле дека постојано ги проценуваат потребите на службениците на терен и дека целта е да им се обезбедат алатки за безбедно апсење и отстранување на лица кои незаконски престојуваат во САД.
Ракавиците се активираат со притискање копче и можат да испорачаат до 30 импулси во секунда. Во нив е вграден и микропроцесор кој ја евидентира секоја активација.
За разлика од електрошокерите „тејзер“, кои користат шилци за да навлезат во телото и можат да испорачаат многу повисок напон, GLOVE функционира преку директен допир. Производителот тврди дека уредот не предизвикува повреди, но во упатството се наведува дека не треба да се користи врз постари лица, мали деца, бремени жени и лица со тешка инвалидност.
Според производителот, ракавиците се наменети за контролирање лица преку предизвикување болка. Некои полициски и затворски служби во САД веќе ги користат, а планираната набавка за ICE би можела да биде најголемата досега за оваа опрема.
Ракавиците би ги користеле агенти на Одделот за истраги на домашната безбедност (HSI), кој се занимава со транснационален криминал, како и агенти на Одделот за операции за апсење и отстранување (ERO), задолжен за апсења, притворање и депортации.
Од Американската унија за граѓански слободи (ACLU) предупредуваат дека ваквата опрема може дополнително да го зголеми ризикот од прекумерна употреба на сила.
Според најавите, договорот за набавката би можел да биде објавен уште во петок, и тоа без јавен тендер.
