Американски разурнувачи биле нападнати во Ормутскиот Теснец

Американскиот претседател Доналд Трамп соопшти дека три разурнувачи на американската морнарица биле нападнати додека минувале низ Ормутскиот теснец, но нагласи дека пловните објекти не претрпеле штета.

— реклама —

Во објава на социјалната мрежа „Трут соушл“, Трамп наведе дека американските сили возвратиле на нападите и дека биле уништени повеќе ирански пловни објекти, како и ракети и беспилотни летала.

„Три американски разурнувачи од светска класа успешно транзитираа низ Ормутскиот теснец под оган. Немаше штета на бродовите, а иранските напаѓачи претрпеа големи загуби“, напиша Трамп, додавајќи дека американските сили ќе продолжат со поморската блокада доколку Иран не постигне договор со Вашингтон.

— реклама —

Претходно, ЦЕНТКОМ соопшти дека американската војска извршила напади врз „ирански воени цели“ откако три американски пловни објекти биле нападнати при премин низ Ормутскиот теснец кон Заливот.

— реклама —

Според ЦЕНТКОМ, Иран користел ракети, дронови и мали пловни објекти, а американските сили ги неутрализирале заканите и погодиле локации за лансирање ракети и беспилотни летала, командни центри и објекти за разузнавање и надзор.

Од друга страна, иранскиот Генералштаб обвини дека САД го прекршиле примирјето со напад врз ирански нафтен танкер и уште еден брод што влегувал во Ормутскиот теснец.

— реклама —

Иранските вооружени сили, исто така, тврдат дека биле извршени воздушни напади врз цивилни области долж бреговите на Бандар Хамир, Сирик и островот Кешм.