Американските авиокомпании против летовите на Ер Чајна за САД

Здружението кое ги претставува големите американски авиокомпании се спротивстави на барањето на кинеската авиокомпанија Ер Чајна да воведе дополнителни летови од Пекинг за Њујорк и Вашингтон, во пресрет на планираната средба на кинескиот претседател Си Џинпинг и Доналд Трамп.

„Airlines for America“, кое ги застапува компаниите American Airlines, Delta Air Lines, United Airlines и други, наведе дека се спротивставува на барањето бидејќи американските авиокомпании практично не можат да летаат од источниот брег на САД кон Кина преку рускиот воздушен простор, додека кинеските превозници можат да ја користат таа рута на одредени летови за САД, пренесува Ројтерс.

— реклама —

Ер Чајна побара одобрение за два дополнителни лета во текот на оваа и наредната недела. Американските авиокомпании сметаат дека тие летови треба да бидат третирани како чартер-летови, со цел нивното одобрување да не отвори можност кинеските превозници да побараат дополнителни редовни линии.

Американското Министерство за транспорт во октомври 2025 година предложи забрана за кинеските авиокомпании да го користат рускиот воздушен простор на летовите меѓу Кина и САД, наведувајќи дека пократкото време на лет им дава предност на кинеските превозници во однос на американските компании.

— реклама —

Предлогот, сепак, наиде на противење од други американски државни институции и беше ставен надвор од разгледување во пресрет на трговските преговори со Кина.

— реклама —

Американските авиокомпании подолго време ја критикуваат дозволата кинеските превозници да го користат рускиот воздушен простор, бидејќи пократките рути им овозможуваат пократко време на лет и помала потрошувачка на гориво, со што се намалуваат трошоците.

Здружението „Airlines for America“ во поднесокот објавен денеска наведе дека кинеските авиокомпании имаат „пократки, поевтини и поекономични рути“ на летовите меѓу Кина и САД.

Русија им забрани на американските и на многу други странски авиокомпании да го користат својот воздушен простор како одговор на одлуката на Вашингтон од март 2022 година да им забрани на руските авиони да летаат над САД, по почетокот на руската инвазија врз Украина.

Кинеските авиокомпании не се опфатени со таа забрана и ја користат можноста за прелет над рускиот воздушен простор, што им овозможи да го зголемат пазарниот удел на меѓународните линии во однос на конкурентите од други земји.