Трамп, Путин и Си Џинпинг на иста маса: Ќе разговараат за намалување на нуклеарното оружје

Американскиот претседател Доналд Трамп, рускиот претседател Владимир Путин и кинескиот претседател Си Џинпинг следната недела ќе одржат заедничка средба во Кина, на маргините на самитот на Азиско-пацифичката економска соработка (АПЕК), соопшти Белата куќа.

Средбата на лидерите на трите светски сили ќе се одржи во јужниот кинески град Шенжен, каде што Трамп ќе учествува на дводневниот самит на 21 земја членка. Информацијата ја соопшти портпаролката на Белата куќа, Оливија Велс.

— реклама —

Една од главните теми ќе биде намалувањето на нуклеарното оружје во светот, кое, според Велс, Трамп го смета за сериозна опасност. На разговорите би можело да стане збор и за Иран, но не и за Украина.

— реклама —

Сепак, висок американски претставник, кој сакал да остане анонимен, изјавил дека не се очекува средбата да резултира со конкретен договор.

Трамп во Шенжен треба да пристигне во среда навечер, а во четврток ќе одржи и билатерална средба со Си Џинпинг. Тоа ќе биде нивна четврта средба откако Трамп се врати на претседателската функција во 2025 година.

— реклама —

Пред посетата на Кина, американскиот претседател во вторник ќе учествува и на самитот на Асоцијацијата на нациите од Југоисточна Азија (АСЕАН) на Филипините.

— реклама —

Средбата се одржува во период кога истече договорот за контрола на нуклеарното оружје меѓу САД и Русија, со што најголемите светски нуклеарни арсенали останаа без клучните механизми за надзор. Со тоа практично заврши и долгогодишната соработка во контролата на вооружувањето, која придонесе за ставање крај на Студената војна.

Обединетите нации ги повикаа Вашингтон и Москва без одлагање да договорат нова рамка. Трамп претходно изјави дека стариот договор би можел да биде заменет со подобар, во кој би била вклучена и Кина, која во меѓувреме го зголемува својот нуклеарен арсенал.