СДСМ преку соопштение упати остри критики кон Андреј Петров, оценувајќи дека тој е еден од најодговорните за, како што наведуваат, најголемиот изборен пораз на партијата на парламентарните избори во 2024 година.
Од партијата посочуваат дека Петров, кој во емисијата „Во Центар“ говорел за состојбите во СДСМ и ја поддржал иницијативата за реформи, бил шеф на изборниот штаб во Првата изборна единица, каде, според нив, СДСМ го забележал најслабиот резултат во својата историја.
„Наместо да преземе одговорност за резултатот, денес ја обвинува партијата и нејзиното раководство“, наведуваат од СДСМ.
Во соопштението се тврди дека Петров признал оти двапати разговарал со претседателот на СДСМ, Венко Филипче, но оценил дека нема смисла да се преговара со него.
Според СДСМ, Петров бил дел од структурите што ја креирале изборната програма и кампањата во 2024 година, поради што, како што велат, не може да се претставува како реформатор.
Воедно, од партијата реагираат и на неговите изјави поврзани со Игор Ивановски, оценувајќи дека наместо да се почитуваат демократските процедури во рамките на СДСМ, се прави обид за наметнување решенија преку притисок однадвор.
„Оваа иницијатива не е обид за реформа. Тоа е обид на луѓе кои директно учествуваа во поразот да се ребрендираат како спасители, додека во исто време ја напаѓаат партијата во момент кога таа се консолидира“, стои во соопштението на СДСМ.
Од партијата додаваат дека Андреј Петров, според нив, не е реформатор, туку дел од проблемот што сега се обидува да се претстави како решение.
