Пожарот кај Кавадарци, кој беше најтежок за интервенција од околу 30-те пожари регистрирани вчера низ државата, е речиси целосно ставен под контрола и се очекува до крајот на денот да биде целосно изгаснат, соопшти директорот на Дирекцијата за заштита и спасување, Стојанче Ангелов.
Тој информираше дека во гаснењето вчера биле ангажирани два „ер трактори“, армиски и полициски хеликоптер, а денеска, од утринските часови, дејствуваат три „ер трактори“, кои заедно со пожарникарите значително придонеле за локализирање на огнот.
Според Ангелов, пожарот бил исклучително тежок за гасење поради стрмниот и тешко пристапен терен, обраснат со густа вегетација.
Градоначалникот на Кавадарци, Митко Јанчев, изјави дека пожарот избувнал на пет различни локации, оддалечени меѓусебно од 500 до 700 метри, поради што, како што рече, постојат индиции дека бил подметнат.
Тој нагласи дека во гаснењето биле вклучени пожарникари, полиција, доброволни противпожарни друштва, механизација, комунални служби и воздухопловите на Дирекцијата за заштита и спасување, а со координирана акција бил опфатен целиот пожарен фронт.
Јанчев очекува пожарот до крајот на денот целосно да биде изгаснат, по што на терен ќе останат патроли за да се спречи негово повторно активирање. Тој додаде дека во пожарот не е зафатена високостеблеста шума, а заштитени се и населените места и имотот на граѓаните.
