Анкета во Србија: Студентската листа во водство, речиси една петтина од гласачите неопределени

„Студентската листа“ би добила 44,6 отсто од гласовите на евентуалните предвремени парламентарни избори во Србија, додека листата на владејачката Српска напредна странка (СНС), предводена од Александар Вучиќ, би освоилa 42,7 отсто, покажува истражувањето на „Нова српска политичка мисао“ (НСПМ).

Анкетата била спроведена телефонски од 25 септември до 5 октомври, на репрезентативен примерок од 1.050 испитаници. Резултатите биле објавени на интернет-страницата на белградското списание.

— реклама —

Според истражувањето, 79,8 отсто од испитаниците сигурно планираат да гласаат, а дополнителни 13,3 отсто одговориле дека веројатно ќе излезат на избори. Два отсто сè уште не знаат дали ќе учествуваат, додека 3,2 отсто изјавиле дека сигурно нема да гласаат.

Меѓу испитаниците што се изјасниле за која листа би гласале, „Студентската листа – Студентите победуваат“ има поддршка од 44,6 отсто, наспроти 42,7 отсто за листата на СНС „Александар Вучиќ – Обединета Србија“.

— реклама —

Останатите политички листи, со исклучок на оние што ги претставуваат малцинствата, се под изборниот праг од три отсто. Социјалистичката партија на Србија на Ивица Дачиќ би добила 2,9 отсто, коалицијата „Европска Србија“ 2,7 отсто, а „Автентична десница“ 2,5 отсто. Другите листи имаат поддршка од околу два отсто.

Резултатите укажуваат на силна поларизација и на можноста изборната трка да се сведе на двата главни блока. Според оценките на аналитичарите наведени во истражувањето, по 14 години владеење на СНС се создава атмосфера слична на референдумско изјаснување. Високата излезност би можела да ѝ оди во прилог на студентската листа, додека СНС, според извештаите, има стабилна база од 1,2 до 1,5 милиони гласачи.

— реклама —

Особено внимание привлекува податокот дека 18,3 отсто од испитаниците не знаат или не сакаат да откријат за кого би гласале.

Ѓорѓе Вукадиновиќ од НСПМ појаснува дека станува збор за редовно есенско истражување на јавното мислење, а не за прогноза на изборните резултати. Сепак, и според него, наодите укажуваат на изразена поларизација во српското општество.

Воедно, постојат загрижености во врска со регуларноста на изборниот процес. Меѓу посочените проблеми се ускратувањето на правото на глас на илјадници луѓе во дијаспората, неизвршувањето на потребните реформи во изборните процедури и сомнежите за постоење десетици илјади таканаречени „фантомски“ гласачи.

Дополнителни прашања отвора и единствениот избирачки список, кој е заклучен со 6.450.523 гласачи. Оваа бројка се споредува со податоците од пописот во октомври 2022 година, според кој Србија имала 6.647.003 жители. Разликата од 196.480 жители е основа за сомнежите во врска со точноста на избирачкиот список, бидејќи би значела дека толку жители се помлади од 18 години и немаат право на глас.