Претседателот на Европскиот совет Антонио Кошта денес попладне ќе престојува во официјална посета на Македонија, каде што ќе оствари средба со премиерот Христијан Мицкоски.
Според информациите од владината прес-служба, предвидена е тет-а-тет средба меѓу Мицкоски и Кошта, по што ќе следи состанок меѓу владината делегација и делегацијата предводена од претседателот на Европскиот совет. По разговорите, двајцата ќе одржат заедничка прес-конференција во Владата.
Посетата на Кошта е дел од неговата турнеја низ земјите од Западен Балкан, која започна вчера во Сараево. Целта на посетите е средби со лидерите од регионот во пресрет на самитот ЕУ–Западен Балкан, што ќе се одржи на 5 јуни во Тиват, Црна Гора, каде што Кошта ќе биде ко-претседавач.
Во рамки на регионалната турнеја, претседателот на Европскиот совет ќе разговара за можностите и предизвиците поврзани со проширувањето на Европската Унија, постепената интеграција на земјите од Западен Балкан, регионалната соработка, како и прашањата за безбедноста и стабилноста.
„Мојата втора турнеја низ Западен Балкан испраќа јасен сигнал: посветеноста на Европската Унија кон регионот е реална; исто толку реална колку и можноста за проширување. Моментумот е тука. Сега е време да се испорачуваат резултати“, изјави Кошта во пресрет на посетата.
Во Скопје тој пристигнува од Тирана, каде што има средби со албанските лидери. По посетата на Македонија, Кошта ќе отпатува во Приштина и Белград, а турнејата ќе ја заокружи во Црна Гора.
Главна тема на самитот ЕУ–Западен Балкан во Тиват ќе биде „Заедничкиот просперитет и стабилност на Европската Унија и Западен Балкан“, со акцент на продлабочување на соработката и забрзување на европската интеграција на регионот.
