Претседателот на Европскиот совет, Антонио Кошта, порача дека Македонија треба да го исполни договореното од 2022 година доколку сака формално да ги отвори пристапните преговори со Европската Унија, притоа нагласувајќи дека нема простор за нови договори или ново преговарање на веќе усвоената рамка.
На новинарско прашање дали Европскиот совет може да даде дополнителни гаранции за Македонија преку заклучоци поврзани со билатералните и идентитетските прашања, Кошта повтори дека ставот на ЕУ останува непроменет.
„Како што кажав пред една година, како што кажав уште тогаш, она што е договорено е договорено. И навистина мора да испорачаме и да го испорачаме она што е договорено и ништо повеќе од тоа. Тоа значи дека она што било договорено во 2022 година треба да се испорача и ништо повеќе од тоа“, рече Кошта.
Тој посочи дека процесот на проширување продолжува врз основа на заслуги и дека другите земји кандидати веќе напредуваат низ различни фази од преговорите.
„За формално да се отвори процесот на пристапни преговори со Северна Македонија, она што ни е потребно е да се испорача она што беше договорено во 2022 година и ништо повеќе од тоа“, додаде претседателот на Европскиот совет.
По дополнително новинарско прашање дали Европскиот совет може да усвои заклучоци кои би претставувале гаранции за Македонија, Кошта не даде директен потврден одговор, но посочи дека таква можност би можела да се разгледува откако земјата ќе ги исполни преземените обврски.
„Посакувам што е можно порано Европскиот совет да има услови да донесе вакви заклучоци. Но за ова, зависи од Северна Македонија да го направи тоа што го договорила во 2022 година“, рече Кошта.
Неговите изјави доаѓаат во период кога во Македонија повторно е актуелна дебатата за уставните измени, кои според преговарачката рамка со ЕУ се предуслов за отворање на следната фаза од пристапниот процес.
Со пораката дека „договореното е договорено“, Кошта практично потврди дека Брисел останува на позициите од 2022 година и дека очекува земјата да ги реализира преземените обврски пред да се разговара за какви било дополнителни политички гаранции или заклучоци.
