Претседателот на Европскиот совет, Антонио Кошта, од денеска започнува петдневна турнеја низ земјите од Западен Балкан, во рамки на која ќе оствари средби со регионалните лидери и ќе учествува на Самитот ЕУ – Западен Балкан во Црна Гора.
Според информациите од Делегацијата на Европската Унија во Скопје, главни теми на разговорите ќе бидат процесот на проширување на Унијата, постепената интеграција на регионот, регионалната соработка, како и безбедносните и политичките предизвици во регионот.
Турнејата започнува во Сараево, по што Кошта ќе ја посети Тирана. Потоа ќе допатува во Скопје, каде што ќе има средба со премиерот Христијан Мицкоски. Следуваат посети на Приштина и Белград, а регионалната обиколка ќе заврши во Црна Гора.
На 5 јуни, Кошта ќе биде копретседавач на Самитот ЕУ – Западен Балкан во Тиват, кој ќе биде посветен на темата „Заеднички просперитет и стабилност на ЕУ и Западен Балкан“.
Во пресрет на посетата, Мицкоски изјави дека очекува со Кошта да разговара за можните решенија за деблокирање на евроинтегративниот процес на земјата, нагласувајќи дека Владата нема да прифати решение кое би го нарушило достоинството на македонскиот народ и граѓаните.
„Секогаш сме имале конструктивни разговори и размена на идеи. Се надевам дека ќе продолжиме во таа насока и ќе видиме дали и како може да се надмине оваа пречка“, изјави премиерот.
Кошта, пак, во пресрет на турнејата порача дека моментумот за проширување на Европската Унија постои и дека сега е време за конкретни чекори.
