Јавното комунално претпријатие „Стандард“ од Дебар упати апел до граѓаните водата да ја користат одговорно и исклучиво за неопходни потреби, поради сè посериозниот недостиг на вода во градот.
Од претпријатието наведуваат дека голем број жители во неколку населби веќе подолг период се соочуваат со проблеми во водоснабдувањето и додаваат дека, и покрај воведените рестрикции, состојбата дополнително се влошува.
„Од 1 јули воведовме четиричасовни, а потоа и петчасовни рестрикции во населбите Венец 1, Венец 2, Тараник и Ќернаница. Сепак, во делови од градот вода нема и повеќе часови, особено на повисоките катови од станбените згради“, информираат од ЈКП „Стандард“.
Претпријатието ги повика граѓаните да не ја користат водата за наводнување градини, полнење базени, миење дворови и тротоари, оценувајќи дека таквата потрошувачка претставува злоупотреба.
Рестрикции има и во селото Долно Косоврасти, каде што водата се исклучува од 10 до 13 часот.
Од ЈКП „Стандард“ посочуваат дека водоводниот систем Росоки – Дебар обезбедува вода за повеќе од 40.000 жители, иако градот има околу 10.000 жители, а во летниот период бројот дополнително се зголемува со доаѓањето на иселениците.
Според надлежните, покрај зголемената потрошувачка, проблемот го создаваат и злоупотребата на водата, дивите приклучоци и ненаплатените сметки, поради што и ова лето се воведени рестрикции во снабдувањето со вода.
