Апелацискиот суд во Ниш го потврди обвинението за убиството на Данка Илиќ

Апелацискиот суд во Ниш го потврди обвинението против Дејан Драгијевиќ и Срѓан Јанковиќ, кои се осомничени за убиството на двегодишната Данка Илиќ на 26 март 2024 година во Бањско Поле кај Бор.

Како што пренесува Танјуг, второстепениот суд ги одбил како неосновани жалбите на адвокатите на Драгијевиќ и Јанковиќ поднесени против решението на Вишиот суд во Неготин за потврдување на обвинението.

— реклама —

Истовремено, Апелацискиот суд ја уважил жалбата на адвокатот на Радослав Драгијевиќ, го укинал делот од решението што се однесува на него и предметот го вратил на повторно одлучување пред првостепениот суд.

— реклама —

Според обвинението, кое е поднесено по дополнување на истрагата, Драгијевиќ и Јанковиќ се товарат за тешко убиство во соизвршителство, додека Радослав Драгијевиќ е обвинет за непријавување кривично дело и помагање на сторител по извршување на делото.

Дополнителната истрага била спроведена по налог на Апелацискиот суд во Ниш, откако двапати било укинато решението за потврдување на обвинението.

— реклама —

Според сомнежите на обвинителството, Дејан Драгијевиќ и Срѓан Јанковиќ со службено возило на ЈКП „Водовод“, каде што биле вработени, ја удриле двегодишната Данка Илиќ, а потоа ја ставиле во возилото.

— реклама —

Се сомнева дека телото прво било фрлено на депонија, а потоа преместено на друга локација. Телото на девојчето до денес не е пронајдено.

Радослав Драгијевиќ е осомничен дека му помогнал на својот син Дејан да го премести телото на Данка Илиќ.